33. Бе
На средината на сцената голема канцеларија со работно биро, голема и длабока црна фотелја, црн кожен тросед и долга канцелариска маса со столици околу, исто така црни кожени. Дневна светлина.Трпе Трпески сам во неа. Ја потпрел ќелавата глава со десната рака, очигледно длабоко замислен. Кога ја крева одвреме-навреме како да се буди мигум, лесно му се видливи брчките на челото. Уште полесно може да се заклучи дека поради нешто е многу загрижен.
Наеднаш тишината ја пресекува ѕвонење на неговиот мобилен телефон. Трпе не брза да го земе в рака, да се јави, како да знае кој му се јавува. Не се ни помрднува од длабоката црна фотелја, туку на мобилниот го вклучува спикерфонот.
Глас од мобилниот:
-А бе кај си ти?
Трпе Трпески:
-Како кај сум бе? Па тука сум. А и кај да бидам бе, за тебе морам да сум секогаш достапен.
Гласот зачудено и срдито:
-А бе што правиш ти?
Трпе Трпески:
-Што правам бе? Ништо!
Гласот:
-А бе како ништо не правиш бе? Малку ти е што ти плаќам за страховладеење, па уште си аздисал во крадење народни пари.
Трпе Трпески:
-А бе тоа ич не е точно. Медиумите измислуваат, а и опозицијата…Кога ти велев да не им даваме толку слобода…
Гласот го прекинува и се засилува:
-Ти си велел! А бе кој си ти да велиш? А бе кој си ти да мислиш? Ти си само платеник и точка. Има да играш како ќе ти речам и точка. А бе кај си се осилил толку?
Трпе Трпески:
-А бе ако веќе не ми веруваш, ако мислиш дека можеш без мене, можеш поарно и побрзо со некој друг…А бе кога ти велам, јас немам врска со аздисаното крадење народни пари. Јас по малку, ама…
Гласот пак го прекинува:
-Ама твоите околу тебе и со тебе по многу, а? Како бе не ти е срам? Како не ви е?
Краток молк, па пак гласот од спикерфонот:
-Ти се јавувам да те информирам бе. Не да се расправам со тебе. Ја кренав браната на матната. Сега ти и твоите околу тебе и со тебе снаоѓајте се, бегајте, кријте се кој кај мисли дека може да се сокрие дури не надошла до вас…А бе што ме мислеше ти мене? Јас те плаќам, а ти уште аздисано крадеш! Која овца! Кои овци!…А бе знаеш ли дека си ми дошол преку глава?…Ама готово е. Нека те однесе тебе и твоите матната!
Трпе Трпески плачливо и сè погласно, дури не се спушти сосем завесата:
-Бе-е, бе-е-е.
