27. Властодржец и советник
Властодржец и советник маскирани замешани во народ, за некој случајно да не ги препознае. Нормално, разговараат тивко за некој да не ги чуе.
Властодржецот:
-Советнику, народов не ми се гледа баш расположен. Што му е?
Советникот:
-Од мои блиски извори во него дознав дека е загрижен ти, партијата и ние да не ја изгубиме власта на следните избори. Опозицијата му се гледа некако сè посилна.
Властодржецот:
-Што збориш бе?! Од кај тоа? Зошто загрижен? Зар досега не научи како победуваме?
Советникот:
-Баш затоа е загрижен. Веќе не му изгледа дека може како досега. Мисли на местенките.
Властодржецот:
-А ти како мој советник што му велиш? Како се обидуваш да го смириш?
Советникот:
-Па, му велам дека треба да биде спокоен. Пак прво ќе подмачкаме, па ќе испомешаме и најпосле ќе ги броиме гласовите како што ни одговара.
Властодржецот:
-Тивко, може некој да те чуе и да станеме сомнителни….И? Што вели? Како реагира?
Советникот:
-Се плаши дека опозицијата научи и нема да дозволи.
Властодржецот:
-А бе каква опозиција!…Мачкина кашлица!…Да не им падне на памет и тие да прават исто?…И да им падне, нема да им успее како ние. Зад нас стои…
Советникот:
-Внимавај, мој властодржецу, да не те чуе некој. Само да не чуе кој.
Властодржецот:
-А розовите очила? Му кажа дека бесплатно ќе обезбедиме за сите? И за него и за ненародните елементи?
Советникот:
-Таа наша новина ја прими многу лошо. Коментира дека баш тоа е многу лошо смислено. Особено зашто ние како власт носиме црни. Со нив му изгледаме како мафијаши. Опозицијата токму тоа почнала да го потенцира.
Властодржецот:
-Што предлага? Има некоја добра идеја во врска со тоа?
Советникот:
-Мисли дека и ние не треба да носиме црни, туку розови. Така опозицијата не ќе може да ја прикажува стварноста црно-бела проткаена со сива, односно ќе ѝ биде џабе и без ефект прикажувањето како сурова и бесперспективна.
Властодржецот:
-Тоа никако! Како е можно тебе како мој советник да не ти текнува што е заднината на таквото мислење? Народов порачува дека јас и ние мораме да станеме народна власт ако сакаме пак да ни ја дадат власта в раце. А тоа би било катастрофално за нас. Тотално не властодржачки и…да не спомнувам што сè значи тоа. Тогаш ќе дигнат раце од нас и ненародните елементи и оние што стојат зад нас.
Советникот:
-Тоа е проблемот, мој властодржецу. На тоа мисли народот кога бара и ние да носиме розови очила. Стварноста стварно сè повеќе му се гледа црно-бела проткаена со сива кога со розови очила нè гледа нас со црни. Сè повеќе се убедува, а во тоа голем удел има опозицијата, дека не само што им личиме, ами и сме мафијаши на власт.
Властодржецот:
-А тоа дека е слеп при очи?
Властодржецот:
-Веќе не е.
Маскирани продолжуваат во народот, замешани, просто втопени во него. Никој ни случајно не ги препознава.
