65. Самотник за болештина за сотирање
„Болештина за сотирање на сè живо со аероплани фрлија на небо за потоа незабележливо и несетно да се истури врз земја плодна и питома. Кои фрлија? Никој не знаеше, а однапред беше предвидено и програмирано да не се дознае никогаш. Како зошто фрлија!? За да се сотре сè живо, да ја направат пустелија, па бездушно да ѝ ископуваат од внатрешноста на нејзиното тело сè што им вреди и им треба. Ама прво да има безусловен живот само за нив, а сиромашен, зависен, неизвесен и бесцелен за сите други.
Не веруваш во теории на заговор? Не верувам ни јас. Мислиш дека болештинава не е тоа? Не знаеш, не си чул за биолошко-хемиска војна?! Која е војување со отрови и противотрови, вируси и антивируси, бактерии и антибактерии…
Добро, нека е по твое. Се разбира дека е вирус болештинава, а пандемијава ќе се победи со имунизација. Во меѓувреме умреа и ќе испоумрат уште којзнае колку. Или ќе загинат. Разликуваш умирачка од загинување?
Запамети што ќе ти речам сега јас, на крајов од мојов ден:
Секоја болештина за сотирање на живот е за нечовечно и самотно живуркање“.
Самотникот Сенко Секавички умре вчера, ден по педесеттиот роденден.
