112. Домашната библиотека
Јас книжевник:
-Творечата енергија во писателот ја поттикнува постојаното и интензивно читање на посебни или секакви книги, на дела од творци во минатото и денес од една избрана, селектирана или од која било област. Лично не познавам писател кој не чита, а пишува/ создава, кој не поседува богата и обемна домашна библиотека. Нагласувам дека зборувам/пишувам за творечката енергија. На тн. љубители на книгата, познавам и такви со богата и обемна домашна библиотека, најчесто им се со специјализирана, стручна литература, пред сѐ непосредно врзана за професионалната ориентација.
Домашната библиотека на писателот е нужно разновидна или од сродни области. Во секој случај белетристичка, но и со дела кои непосредно или посредно му припомагаат во пишувањето/создавањето на своето книжевно творештво-филозофски, естетички, психолошки, лингвистички итн.
Пред да го чуе мислењеро на Јас обичен смртник, Јас книжевник додава:
-Мислам дека, за разлика од поетите, библиотеките на прозаистите се многу побогати со дела од области блиски на неговиот творечки интерес. Па и научни.
Обичниот смртник, кој го придружува на секој чекор и пишува белешки за неговиот живот, за неговото блиско и далечно минато и за неговото творештво, забележува:
-Добро, сиве овие книги во твојава библиотека, велиш дека се повеќе од три илјади на број, си ги прочитал?!
Јас книжевник:
-О, секако не! Тамам работа. Мислам повеќе од половината. Некои воопшто не сум ги отворил. Ама секоја мора секогаш да ми биде при рака. Во последно време повеќе пишувам/создавам проза, романи и раскази, па најмногу ги читам и препрочитувам историските, филозофските и психолошките.
-Тоа ми е сосем разбирливо,-забележува Јас обичен смртник.
Полиците со книги се во ред и небрежно оставени над нив, како фрлени, расфрлани. Ги има безброј и на подот од собата, во сите нејзини агли, под прозорецот и на писателската маса.
