57. Барам
Што барам јас во земја во која
има многу мртви
и понекоја жива куќа?
Барам уште некоја жива!
Што барам јас во земја над која
има многу крвави облаци
и понекоја громовна секавица?
Барам уште некоја громовна!
Што барам јас во земја со која
владеат глуви стени
и понекоја сенка мудра?
Барам уште некоја мудра!
Што барам јас низ земја која
имала сал народ без траги
и понекој човек божји?
Барам уште некој божји!
