9. Гола угорница
Штотуку слегов од врвон
на голава угорница
што ја искачив во рани зори.
Можам секому во живот,
со живот да му докажам
дека искачувањето
е секогаш многу полесно,
што значи и побрзо
одошто слегувањето;
секако најпрво затоа што
оваа е гола угорница.
Многу е важно да се знае
дека угорницава не е
и удолница
како секоја друга;
не само оти е гола,
туку е неповторлив
пределот под неа
од нејзината
највисока точка:
врвови, хоризонт,
синевина,
ведрина и тишина.
Откога знам за себе
знам дека угорницава
била гола барем за мене
и за секој со мене.
Каменита, пуста, безводна,
бесплодна,
речиси невозможно во неа
човек да се вкорени.
А ете, јас штотку почнав
баш во неа
да се вкоренувам.
