118. Плач и смеа
Се сретнале плач и смеа
на полпат на игра
крај пресушен извор
на живот.
Се сретнале,
та продолжиле
по заеднички пат.
119. Пуст остров
Еден слеп патник
на пуст остров
среде
тревожни соништа
бара сопатник.
120. Одѕвон
Одвај слушлив одѕвон
на збор неизречен
меѓу две тишини
неизвесни.
121. Некои луѓе
Некои луѓе собрани
околу некој човек
кој говори за нечие
минато дамнешно
што го открил
сосем случајно.
122. Во љубов
Маж и жена
со кршни,
со голи стави
прегрнати,
одвај видливи
на хоризонт.
