19. Меѓу земја и небо
Стои цврсто на нозе
меѓу земја и небо,
замислен;
дали уште некое време
да постои
или да тргне
кон нов хоризонт
ту близок ту далечен.
Замислен е зашто сам
долго, та предолго
стои така
меѓу земја и небо,
а залезот на денот
без ноќ негова
сè повеќе навалува.
Се прашува зошто
нема одговор
дали да тргне
кон колку може
подлабоко в земја
или да почне
да се извишува
до небо
за на небо да изгрее
заедно со сонце негово.
Меѓу небо и земја
тој е најчесто птица
бескрилна.
