2. Незнајни потомци

На трага ми се потомци
незнајни
со намисла да откријат
нешто за мене со нив,
за со нив да бидам,
за со мене да бидат
по многу векови
моја и нивна самост
во корените.

Не знам, но не мислам
дека треба да знам
зошто ја бараа и зошто
ја најдоа конечно.

Дека ми била и ми е
неизбришлива?!
Ме залажуваат
и се залажуваат сами!

Одамна ништо не значи
дека сум им предок
дамнешен
и дека ми се потомци
од којзнае кога;
исто како да не сум им,
исто како да не ми се.

Што оти ми се на трага
кога сум одамна
бестрага?