СЕ ПРАШУВА БЕЗ ДА СИ ОДГОВОРИ ИЛИ ДА ПОБАРА ОДГОВОР. НАЈЧЕСТО СЕ ПРАШУВА ПО КОНСТАТИРАЊЕ НА СОСТОЈБА И СОБИТИЕ ПРЕД КОИ СТОИ. ИЛИ Е ВО НЕДОУМИЦА ДАЛИ ДА ПРОДОЛЖИ ДА СЕ ОБИДУВА ДА ГИ НАДМИНЕ.

СЕ ПРАШУВА ЗА СЕНЕШТО, НЕ УСПЕВАЈЌИ ДА НАЈДЕ КАКОВ БИЛО ОДГОВОР.

ПОРАНО ПОЧЕСТО, А ВО ПОСЛЕДНО ВРЕМЕ СĖ ПОРЕТКО ПРАШУВА НЕКОГО, ПРИТОА НЕ ЧЕКАЈЌИ ДА ДОБИЕ ОДГОВОР. НЕРЕТКО ГО НАГЛАСУВА ТОА, ИМЕНО ДЕКА ПРАШУВА ИЛИ ЗАТОА ШТО ГО ЗНАЕ ОДГОВОРОТ ИЛИ ЗАТОА ШТО ЗНАЕ ДЕКА ПРАШАНИОТ НЕ ЗНАЕ ДА ОДГОВОРИ. ПА ЗОШТО ПРАШУВА? ОНАКА. КОЛКУ ДА ПРАША. НЕКОГАШ ЗА ОТПОСЛЕ ДА НЕ ГО ПРАШУВААТ ЗОШТО НЕ ПРАШАЛ КОГА ТРЕБАЛО ДА ПРАША.

СЕ РАЗБИРА ДЕКА СЕ СЛУЧУВА ДА ПРАША НЕКОГО ШТО ЗНАЕ ДА МУ ОДГОВОРИ. ТОГАШ ПОМАЛКУ САМИОТ, А МНОГУ ПОВЕЌЕ ПРАШАНИОТ СЕ НАЈДУВА ВО НЕПРЕДВИДЛИВА, ПОНАЧЕСТО НЕПРИЈАТНА СИТУАЦИЈА. ИМЕНО, НАМЕСТО БЛАГОДАРНОСТ ДЕКА  МУ ПОМОГНАЛ СО ОДГОВОРОТ, ДОБИВА ОДГОВОР ИЛИ СО УСЛОВЕНО ПРАШАЊЕ ИЛИ, ПАК, СО ПРАШАЊЕ ШТО СОДРЖИ ОДГОВОР. ТОГАШ ПРАШАНИОТ ГО ЗАМОЛЧУВА СО ПРАШАЊЕ ЗОШТО ГО ПРАШУВА КОГА ГО ЗНАЕ ОДГОВОРОТ.

ИМА ЕДНО ПРАШАЊЕ КОЕ СИ ГО ПОСТАВУВА ИЛИ МУ ГО ПОСТАВУВА НЕКОМУ, А НА КОЕ ОДГОВОРОТ МОЖЕБИ НЕМА ДА ГО ДОБИЕ ДОДЕКА Е ЖИВ. ПРАШАЊЕТО ГЛАСИ:

ЗОШТО ЧОВЕК СЕ ПРАШУВА И ПРАШУВА ЗОШТО Е ЖИВОТОТ ТАКОВ КАКОВ ШТО Е?

НАСЛОВИ (СЀ ВО НАСЛОВ), насловна проза, 47