Подземна сила издигнала
карпест ѕид
меѓу човек снеможен
и небо непрегледно
дали за да ги брани
од наезди на скитачи
низ пустошијава
дали за да ги сочува
какви што се
за подобри времиња
идни.

Ѕидот нема
ни шуплини ни процепи
гладок е како некој
совреме да домислил
дека никој жив или мртов
не смее да го искачува
а ни да помисли
со голи раце да го крши
со сончев зрак
да го пробива.

И човекот снеможен
и небото непрегледно
сè уште не се прашуваат
каква е чија е од каде е
таа сила подземна
што се разбира со умисла
го издигнала
но се согласни дека
не треба
всушност не им вреди
да се прашуваат зошто е.

ОГОН ВО ПУСТОШИЈА, Мразнина, поетска студија, 55