936. Те премолчуваат, а ти громогласен.

937. Земјата дава и одзема сила.

938. И заедничкиот живот во нови форми и со нови содржини. Не под ист покрив.

939. Час поскоро со велики, зналци, мудри и опитни луѓе на чело.

940. Моите одлуки во врска со моето дело се конечн и неменливи.

941. Оние што само уриваат или не знаат или не сакаат да градат.

942. Епитаф:
Живееше достоинствено и умре спокојно.

943. Творецот е само со себе сè додека создава дело.

944. Во суштината на животот многу љубови во човек за човек.

945. Велик човек само со велико дело.

946. По смрт нова светлина, блиска или далечна.

947. Никому ништо ако ти одговарам дека не е точно тоа што го тврдиш?

948. Сеопшт напредок:
Квалитетен квантитет.

949. Не хиерархија во заедница, туку единство и рамноправност.

950. Викаш на сет глас „Фатете го крадецот!“ од страв да не те фатат.

951. Не чекањето, а неизвесноста води кон самопоразување.

952. Го сакаш она што ти прилега.

953. Никакви дилеми при решителност.

954. Тесна и стрмна врвица пред прав пат.

955. Немој да мразиш ако не сакаш.

956. Секому што заслужил, никому за што не е од него.

957. Никогаш задоволен од себеси.

958. Будните луѓе се претпазливи и сомнежни.

959. Правото на сомневање за креативниот дух е најголем поттик. Исто и за истражувачкиот.

960. Загрижувачки е бројот на тутумраци во политичките партии, поготово во опозиционерските.

961. Сè повеќе злоупотребени народни пари. Дури повеќе од украдени.

962. Порази по пораз без свесност за причините и последиците.

963. Треба секогаш да се има предвид дека не може да се владее со луѓе, туку да се работи со нив и за нив.

964. Голем чекор по многубројни мали.

965. Мозокот е мозок со учење и мислење, наспоредно со одржување на психофизичките способности.

966. Сосем слободен дух-независен од материјалното во животот.

967. Ги љубам сите кои споделуваат со мене вредности во животот.

968. Никој по мене што не е свој.

969. Јас во ваши животи? Можеби во некои негови мигови.

970. Има нешто незаборавно? Стравувам дека нема.

971. Батали политика. Ај за нешто човечко. Што е во него.

972. Од никого не почнува ништо.

973. Мојот живот не бил и не е толку празен, колку што е поразуван.

974. Ме викаш, а знаеш дека не можам да ти дојдам.

975. Баш убаво:
Јас меѓу познати, а јас непознат.

976. Жално е што изумираме умирајќи.

977. Се сеќавам само дека беше дамна.

978. Јас нигде, а сегде мои непријатели.

979. Не е сè така црно додека гледаш, слушаш, спознаваш и мислиш.

980. Прашувај ја власта одговорно. Не популистички и политикантски.

981. Прочуен надвор, а нечуен, непризнаен и несогледан дома.

982. Едни на крстопат, други на ветромет.

983. Човек со човек за човек во човек.

984. Зграпчи го денот по бурна ноќ.

985. Што следно од мене? Неважно. Како сè досегашно.

986. Ништо од тебе додека не знаеш што правиш.

987. Вредни дела на живот што вреди.

988. Додека на сцената се игра претстава на тема живуркање, зад неа се прекројува и се престројува светот.

989. Сиромав и за жалење само љубов го одржува во живот.

990. Тој не е со сите и затоа не игра.

991. Благодарение на технолошкиот развој, човечката цивилизација граби напред кон самоуништување.

992. Македонија мора веднаш да ги раскине Преспанскиот договор со Грција и Договорот за (не)добрососедство со Бугарија. За да опстане!

993. Болната и здравата вистина се над сите вистини на светот.

994. Не ти треба повеќе отколку што ти треба.

995. Човек треба со иста мера да гледа, да слуша и да чита.

996. Учи како вреди да се живее.

997. Богати се оние држави и општества во кои беспрекорно функционираат системи за среќни луѓе.

998. Ако сакаме да живееме здраво, умноста и разумноста мора да предводат во сè.

999. Се креваш и паѓаш сè додека не застанеш на свои нозе.

1.000. Мисли и дејствувај или создавај истовремено.

ДУМАЊЕ НА ГОЛЕМ И МАЛ ЧОВЕК XXIV