Стручњаците предупредуваат: помалку од 8 часа спиење секоја ноќ е лошо за здравјето. Тоа едновремено го зголемува ризикот од срцеви болести за речиси 50%.
Научници од универзитетот Ворвик во Велика Британија потенцираат дека премалото време на спиење во подолг период го зголемува ризикот од срцев напад и удар. Утврдиле дека човечкото здравје го чува сонот од 6 до 8 часа. Тие ги следеле случувањата во период од 7 до 25 години кај повеќе од 470.000 лица од 8 земји, меѓу кои Велика Британија, САД, Шведска и Јапонија.
Заклучок:
Доколку ноќе се спие помалку од 6 часа и сонот е испрекинат, изгледите од сериозно влошување на срцевите болести се зголемуваат за 48%, додека ризикот од срцев удар се зголемува за 15%.
Трендот на доцно легнување и рано станување е темпирана бомба за нашето здравје. Од модерниот човек се очекува многу, цела низа на животни и деловни активности кои во текот на денот му одземаат од времето за спиење.
Хроничната ненаспаност, пак, произведува хемикалии во телото кои се виновни за зголемениот ризик од развој на срцеви болести, но и за зголемен притисок, дијабетес и дебелеење. А премногу спиење, што значи повеќе од 9 часа, може да биде показател на болести, вклучувајќи и кардиоваскуларни.
Како да се реши проблемот на лошо спиење? Совет: воведете во подготовките мали ритуали кои не ве чинат ништо, освен добра волја и време.
Конкретно:
Проветрете ја спалната соба, спијте во постудено и одете во постела во исто време. Туширајте се во млака вода еден час пред спиење. Отворете прозорец и надишете се свеж воздух, испијте благ растителен чај. Постелнината нека биде чиста и памучна, а на перницата ставете неколку капки мирис од лаванда.
Исфрлете го телевизорот и компутерот од спалната соба, а алармот на мобилниот заменете го со звук на радиоприемник- будењето ќе биде полагодно и без стрес.
Стручни совети за добро спиење:
-одете в кревет само кога сте поспани. Ако не ви се спие, читајте нешто или гледајте ТВ
-наутро станете отприлика во исто време, секое утро, без оглед кога сте легнале в кревет
-навечер пред спиење опуштете се со топло туширање
-јаболко пред спиење ќе ви го олесни и смири варењето во стомакот
-имајте дневно доволно физичка активност
-избегнувајте алкохол и кофеин неколку часа пред спиење.
Неколку корисни стручни сознанија за сонот:
Тој е една од основните човечки потреби, еднакво битна како и дишењето. Нашата потреба од сон е примарна, а сепак често ја туркаме на периферијата, го жртвуваме поради работа, пријатели, учење или забава.
Лица кои спијат 6 часа или помалку ги зголемуваат ризиците од развој на разни болести, особено психички како биполарни пореметувања, анксиозност, напад на паника и депресија.
Некои луѓе едноставно не обрнуваат внимание на сонот. За нив е добриот сон едноставен- легнуваат в кревет и заспиваат. Меѓутоа, оние што со часови се превртуваат наутро се будат нерасположени и уморни. Има лек?
Има: начинот на кој живееме се рефлектира во начинот на кој спиеме. Следствено, треба да се излечат евентуалните болести кои предизвикуваат несоница и да се променат дневните навики на однесување.
Што ја предизвикува несоницата?
Посотојат неколку медицински состојби:
-опструктивни апнеи за време на спиење
-дрога или зависност од алкохол
-синдром на немирни нозе
-депрсии и анксиозни пореметувања
-деменција, Паркинсонова болест
-хормонални промени- менструација, менопауза.
Од навиките:
-зголемено работно време
-работа во смени
-голем настан- развод, смртен случај, загуба на работа
-патување
-лоша хигиена на спиење- легнување и будење во различно време
-кофеин пред спиење
-неадекватна вежба на телото
-недоволно дневни физички активности
-седечки стил на живот пред телевизор или компјутер
-вознемирувачки ТВ емисии или филмови пред спиење.
Посебна препорака: за добар сон угасете ги екраните Ако ви е тешко да заспивате навечер, можеби решението се крие во гасењето на сите екрани- на телевизорот, компјутерот и мобилните еден час пред легнување в кревет.
Д-р Чарл Чејслер од Харвард истакнува дека технологијата ја узурпира и нашата спална соба, а поради што некои луѓе се константно ненаспани. Вештачкото осветлување што го емитуваат електронските апарати во домот премногу го стимулираат мозокот и доста често е виновно за несоница.
Најлоши активности со кои можете да се занимавате пред одење в кревет се видео игрите, сурфањето на Интернет преку мобилен и активности на социјалните мрежи. Тие претерано го активираат мозокот и го разбудуваат телото на кое потоа му е тешко да се прилагоди во помирна состојба.
А што е со попладневниот сон? Доколку е редовен, тој е добар за срцето и го продолжува животот!
Како што објави неодамна „Дејли Мејл“, на паметењето му помага дневен сон од само 6 минути, а 20- минутно спиење го забавува работењето на срцето, ја зголемува концентрацијата и го крева расположението. 40- тина минути сон во текот на попладнето го снижува крвниот притисок.
Американски истражувачи објавија дека попладневното дремење значително му помага на здравјето на срцето, особено ако во текот на ноќта не се спие доволно. Слични наоди имаше и во поранешни истражувања на оваа тема. На пример, една студија во Грција покажа дека 30-минутно спиење најмалку 3 пати неделно дури за 37% го намалува ризикот од сериозни срцеви заболувања.
Во текот на истражувањето на универзитетот во Калифорнија се покажало дека волонтерите, по 90 минути дневен сон, подобро се снаоѓале и подобро решавале сложени пишани тестови од оние кои биле будни цело време. Се сугерира дека краткиот дневен сон му помага и на паметењето, но не е доволно само да се спушти главата на перница, туку сон од најмалку 6 минути. Добар ефект има дури и ако не потонете во сон, туку само легнете и ги успокоите телото и духот.
40-минутното спиење го урамнотежува имунолошкиот систем и ја продолжува енергијата. Меѓутоа, сон подолг од тоа може да дезориентира и да умртви, па не е лошо да се навие аларм за будење по 45 минути.
Сепак, доколку имате доволн време, добро е да се отспие и цел час ипол до 3 часа. Во тој случај се минува низ цел циклус на спиење, вклучувајќи и длабок сон кој го обновува телото.
Најдобро време за дневно спиење за повеќето луѓе е помеѓу 13,00 и 15,00 часот. Научниците препорачуваат и неколку трикови за брзо заспивање: може да помогне замрачување на просторијата или барем маска на очите, а многу е подобра лежечката положба- во седечка, без оглед колку е лагодна, може да требаат и 50% повеќе време да се потоне во сон; кафе може да се испие непосредно пред спиење, зашто на кофеинот му треба до половина час да почне да дејствува, па ќе помогне токму кога треба- при разбудување; доколку сонот не доаѓа, треба да ги спуштите капаците на очите и да се концентрирате на сопственото дишење- тоа треба да биде длабоко и бавно.
