1. Заложба-проект
Со прифаќањето на радиото како радио на современата модерност се негираат односно отпаѓаат сите песимистички ставови и тврдења за бесперспективноста на радиото, на неговиот дефинитивен „пораз“ од телевизијата и Интернет, на негова „замена“ со други, помодерни, технолошки поразвиени и нови средства за масовна комуникација (своевремено слични предвидувања имаше и за печатот со појавата на телевизијата.).
Со други зборови, прифаќајќи ја современата модерност на радиото, всушност се афирмира неговата супремација во однос на другите медиуми.
Која е појдовната-основната позиција на радиото на современата модерност како медиум кој денес е, а без сомнение и во иднина ќе биде главниот, најдобриот, најважниот соговорник-пријател на човекот; позиција која ќе ги респектира сите досегашни искуства и сознанија, но и ќе ги антиципира неговите есенцијални генерички промени?
Бидејќи авторот на оваа студија беше најнепосредно ангажиран (како сопственик, Одговорен уредник и програмски медијатор) во реализацијата на радио-проектот Евергрин Гром Радио, кој се темели врз светски сознанија и практични искуства, елаборирајќи ги неговите специфики како и правците на развојната стратегија и програмско-уредувачката политика, на најилустративен начин ќе се одговори на поставеното прашање, како и на низа други што произлегуваат од него.
(Напомена: По речиси 10-годишно постоење во македонскиот радиодифузен простор, од 1996-та до 2005-та, проектот престана да се реализира поради неповолниот амбиент, недоволната маркетиншка поддршка, а пред сè поради неспроведување и непочитување на законската регулатива од конкурентни медиуми и регулаторното тело-во тој период Совет за радиодифузија на Република Македонија.)
Според развојната стратегија и програмско-уредувачката политика втемелени во програмската шема, Евергрин Горм Радио може да се нареди меѓу оние радија што ги следат потребите на времето, на сегашноста, а едновремено се постојани во дослух со утрешното, идното време. Современата модерност ја детерминира следнава дефиниција (и како препознавање и како визија):
Евергрин Гром Радио е (-треба да биде) радио кое ја одразува динамиката на времето што го следи:
–го регистрира, го толкува и вреднува, но и го открива оној дел од него што „зачекорил“ во утрешниот ден;
–радио кое секогаш е дел од стожерот на сов ремената модерност на живеењето: во концепирањето, оформувањето, организацијата;
–со програма која во себе ги инкорпорира светските искуства и сознанија во рамките на својот постојан-редовен и на слободниот-алтернативен простор;
–со програма која не само што го задоволува, туку и го анимира, односно го ангажира својот слушател, притоа наметнувајќи строго утврдена и афирмирана уредувачка политика;
–радио што не е безлично и без стил туку, напротив, создава и афирмира вокални личности, со постојана активна улога на рецепиентот-слушателот;
–радио со постојана програмска и содржинска актуелност, што значи современо во динамичка смисла и во сопственото траење;
–радио кое во секој свој сегмент и во секој миг ја потврдува својата веродостојност;
–со сопствен идентитет (радио-дизајн);
–функционално и комплексно, реално и визионерско, вокално и визуелно, антиципативно и постојано авангардно (постојано со нови стереотипи што ги менува создавајќи ги);
–радио што е во постојан процес на модернизација: менување, реорганизација, техничко-технолошко обновување, развој и усовршување, радиска „реанимација“;
–радио кое во континуитет се грижи за кадровското оспособување–специјализација на постојниот ангажиран кадар, како и негово континуирано „освежување“;
–постојано збогатување на програмско-реализаторската ориентација (–динамика);
–осовременување на методите на истражување на медиумскиот пазар-развој на маркетингот во сета негова комплексност-креативност (специјална маркетиншка-комерцијална програма која радиото на современата модерност го афирмира како бизнис радио, со богата и разновидна понуда за деловно–техничка соработка).
