Паркот „Жена Борец“ во центарот на Скопје влегува во целосна реконструкција. Градежните активности опфаќаат обновување на пешачките површини, реставрација на урбаната опрема и дополнително хортикултурно уредување на еден од највидливите јавни простори во централното градско подрачје.
Градоначалникот на Скопје, Орце Ѓорѓиевски изврши увид во работите. Според информациите од Градот, постојните плочки и дел од пешачките патеки се заменуваат со мермерни површини, а паралелно се обновуваат елементите на урбаната опрема и се планира дополнување на зеленилото.
Повторно е запален и Вечниот оган
Во рамките на уредувањето на просторот повторно е ставен во функција и Вечниот оган кај фонтаната, кој извесен период не работеше. Со тоа реконструкцијата зафаќа не само партерни и зелени површини, туку и елементи што имаат симболичко и мемориско значење за центарот на градот.
Паркот е непосредно спроти Собранието и е дел од една од најфреквентните пешачки оски во Скопје. Токму затоа обновувањето на овој простор не завршува со поставувањето нов материјал. Прашањето е како обновените патеки, зеленилото и урбаната опрема ќе се одржуваат откако градежната механизација ќе си замине.
Panoptikum веќе го отвори тоа прашање во текстот „Фонтаните се вратија во Скопје, ама градот допрва треба да покаже дека знае да ги одржува“, а сличен тест следува и за обновувањето на плоштадот „Македонија“.
Реконструкцијата на „Жена Борец“ е уште една интервенција во централното градско јадро. Нејзината вистинска вредност ќе биде видлива подоцна – ако обновениот простор остане чист, функционален, зелен и редовно одржуван.
