Нови германски инвестиции и посилно институционално поврзување беа во фокусот на средбата на премиерот Христијан Мицкоски со премиерот на Северна Рајна-Вестфалија, Хендрик Вуст, во рамките на работната посета на македонската владина делегација на Германија вчера и денеска. На средбата учествуваа и вицепремиерот и министер за транспорт Александар Николоски, министерот за надворешни работи и надворешна трговија Тимчо Муцунски и министерката за енергетика, рударство и минерални суровини Сања Божиновска.
Од постојните фабрики кон нови компании
Разговорите со Вуст се надоврзаа на економскиот дел од посетата, која започна на 2 ноември со средби со претставници на компании во Бон. Во фокусот е Северна Рајна-Вестфалија – една од економски најсилните германски покраини и регион од кој веќе доаѓаат значајни индустриски компании присутни во Македонија.
Како примери беа посочени „Костал“, „Кромберг и Шуберт“, „ВИК“ и „Гересхајмер“. Нивното присуство треба да послужи како аргумент дека земјата може да привлече и други германски компании и нови производствени капацитети. Засега, сепак, не се соопштени конкретни имиња, вредност на можните вложувања или рокови за реализација.
Следниот тест за економската дипломатија ќе биде политичкиот дијалог да се преточи во конкретни договори, капитал, технологии и работни места. Во првиот ден од посетата, за кој Panoptikum веќе пишуваше, деловните разговори и односите со македонската дијаспора беа меѓу главните теми.
Фокус и на институциите, технологијата и дијаспората
Муцунски ја опиша Северна Рајна-Вестфалија како значаен политички и економски партнер и посочи дека разговорите опфатиле технолошко поврзување и посилни врски меѓу компаниите и институциите. Како дополнителна врска меѓу двете општества беше посочена и македонската дијаспора.
Односите со оваа германска покраина веќе имаат институционална основа. За периодот 2026-2030 е предвидена рамка што опфаќа економија, образование, култура, здравство и поддршка за европската интеграција на Македонија. Претходна декларација за интензивирање на врските беше потпишана во 2021 година, а во меѓувреме се реализираа и иницијативи во образованието и локалниот развој.
Вуст подготвен да ја посети Македонија
Една од пораките од средбата на 3 ноември е подготвеноста на Хендрик Вуст да ја посети Македонија. Мицкоски тоа го претстави како можност разговорите да продолжат со поконкретна деловна агенда.
Паралелно, Николоски во изминатиот период ги отвори и практичните прашања што ги засегаат германските компании и македонскиот извоз – транспортната инфраструктура, железничкото поврзување и положбата на професионалните превозници во Шенген-зоната. За тие разговори Panoptikum пишуваше во посебна анализа.
Средбата со Вуст е дел од поширокиот обид германското присуство во Македонија да се прошири со нови компании, технологии и капацитети. Вистинскиот показател ќе биде конкретноста – кои компании ќе покажат интерес, во кои сектори и дали разговорите ќе донесат нови работни места.
