Потребно време за читање: 2 минути

Летник е македонски народен празник којшто се празнува секоја година на 1 март по стар календар и е поврзан со враќањето на птиците преселници од јужните краишта во Македонија. Всушност, овој празник во народните верувања е празник за почеток на пролетта односно летниот период, периодот на цутењето на пупките на дрвјата и почетокот на земјоделските работи. Поради ова негово значење, празникот често е квалификуван и како празник за почетокот на годината во смисол на активниот работен период од годината.

Празникот најчесто се празнува во Западна Македонија, односно во Галичник и Мијачијата, Голо Брдо, Пустец, Дебарско, Преспа, Охридско и Струшко. Празникот има повеќе народен отколку верски карактер, па така во оние области каде живеело верски мешано население-Македонци православни и Македонци муслимани, како во Голо Брдо и Реканската област, празникот го прославувале сите, и православните и муслиманите. Поради тоа што е прославуван и од христијаните и од муслиманите, за празникот се смета дека е од паганско потекло.

Прочитај и за ... >>  Од древниот свет: Вавилон

Со процесот на миграција од село во град овој празник е главно запоставен, но сѐ уште се празнува во руралните региони на Голо Брдо и Мала Преспа, како и во струшки Дримкол.

Поради тоа што е празнуван само од етничките Македонци (и христијани и муслимани) и неговото славење е најпознато во просторите на етничка Македонија, овој празник се смета како етнички македонски народен празник.

Се сметал и за почеток на годината кај Античките Македонци.

На истиот датум, 1 март, Античките Македонци го празнувале својот празник на светлината наречен Ксантика. Древното верување за него било поврзано исто како и со современиот македонски народен празник Летник.

Празникот Ксантика исто така бил поврзан со зголемувањето на аголот на паѓањето на сончевите зраци, односно со зголемувањето на светлината и времетраењето на денот, како и со почетокот на пролетта-летната сезона во годината, цутењето на пупките на дрвјата и започнувањето на земјоделските работи. Овој древен празник поради истиот датум и истото верување со современиот македонски празник се зема за еден од доказите за етногенетските врски и поврзаноста помеѓу Античките и современите Македонци.

Прочитај и за ... >>  Историската заднина на спорот за името помеѓу Македонија и Грција

Според сведоштвата на луѓето, празникот Летник започнувал да се празнува уште во раните утрински часови на 1 март, заеднички и од Македонците рисјани и муслимани.

Веднаш рано изутрина, штом ќе се станело од спиење, луѓето гледале и барале да здогледаат некое пиле (птица) за, според верувањето, да бидат лесни како птица преку целата година. Потоа погледнувале во своите џебови да имаат златна или сребрена пара за преку годината секогаш да имаат пари и успех (бериќет). Се излегувало во шумите и планините и оттаму во домовите се носеле тукушто расцутени дренови гранки и кај куќното огниште луѓето наизменично се фаќале за дреновата гранка и за синџир за преку годината да бидат здрави како дрен и цврсти и силни како железо, а потоа за здравје се каснувале пуполците од дренот. Младите деца береле суви гранки и оделе од куќа до куќа фрлајќи ги во куќните огништа и велејќи: „Колку шумулчиња (пламенчиња), толку дечиња“ (слично како за Бадник пред Божик).

Прочитај и за ... >>  Македонско и светско оро: Тешкото

На Летник задолжително, доколку се одело во посета на некоја куќа, се носело гранка од дрен, а домаќините го гоштевале гостинот со ореви, варена пченка и благо. Тој што ќе се погодел прв во денот да им влезе на домаќините в куќа, годината им минува со радост и успех (бериќет) од него, па затоа домаќините идната година на Летник го бараат повторно да им влезе в куќа (не мора да е прв, може и само како гостин), зашто за него се верувало дека е со „среќна рака“.

(Извор:„Македонска нација“-http://www.mn.mk)

LEAVE A REPLY

Please enter your comment!
Please enter your name here