7. Игралита песна

Одблизу и оддалеку
секогаш се слуша сега,
како некогаш да била
без зборови што значат,
без знаци за откривање
и без мисла дека може
кога било да не биде.

Игралита ни е песнава
што на небо почнува
да нè раскрилува,
па на земја продолжува
со своја немост
да нè разделува.

Зашто сме сè подалечни,
зашто сме сè подлабоко
во своите самости.

Да ја испееме докрај
уште еднаш
песнава игралита
додека играме живот
молскотен и родлив.