Сенко Виделиноски има што да каже за постојаноста, а имајќи ги предвид пред сè неговите години и неговото лично искуство. Ретко му идат роднини и пријатели на кои радо им кажува или подробно им раскажува. Затоа што не сака да им биде здодевен.
За постојаноста и нејзината поврзаност со неговиот живот, причинско-последични со годините и личното искуство, Сенко Виделиноски зборува кусо, во два-три збора или долго. Секогаш имајќи го предвид трпението на соговорникот односно слушачот.
Во два-три збора:
-Се разбира дека не случајно си направив живеалиште покрај изворов на бистра вода, на крајов од населеново место и на рабов на густава дабова шума. Најпрвин зашто почнав втор живот, фала му на Господа, а потоа поради постојаноста на моето постоење. Сигурен сум дека ќе го разберете тоа ако останете ден-два со мене, ако споделите со мене макар ден и ноќ. Најпрвин дека секој човек во животот одживува два, три и повеќе од три животи, а потоа постојаноста на постоењето да ја прифатите како докажување на неговата личност.
Најкусо долго и најконкретно:
-Го заживеав и го живеам мојот втор живот овде, откако ненадејно ми заврши првиот. Да, точна ви е претпоставката дека дојдов до почетокот на смртта.
Имав сообраќајна незгода и бев во таканаречената клиничка смрт цели пет месеци. Не е за верување, но во таа состојба јас постојано бев со мои одамна и од неодамна мртви претци. Живеев со нив. Истовремено со исчекување ги следев сите обиди на лекарите да ме вратат во живот. Како продолжение на мојот прв и потврда на мојата постојаност на постоењето.
Да, точен ви е заклучокот дека се вратив во овој свет, го почнав мојов втор живот едно рано утро, но со јасно слушната порака од Господа: морам коренито да го променам начинот и ритамот на мојот опстанок. Особено спротивставувајќи се на брзаницата на животот, а бранејќи ги спокојот и ведрината на духот.
Седнете до мене крај изворов на бистра вода и послушајте го неговиот жубор. Тој е постојан, неменлив, ту посилен ту послаб од еден до друг камен или корен. Исто како животот. Прв, втор или трет. Најважно од сè поврзано со него се неговото постојано течение и бавното, едвај согледливо длабење и ширење на неговото корито. Прудолу, по работ на густава дабова шума.
Можеби ќе посакате, јас сум сигурен дека ќе посакате да поживееме некое време заедно.
Сенко Виделиноски го живее својот втор живот.
ПРЕД ИСЧЕЗНУВАЊЕ (МОЖЕБИ РОМАН ОД СЛИКИ И ЗБОРОВИ), роман, 46