fbpx Прескокни до главната содржина

Од еден двајца

Рубрики: Препев на пев и повев - поетска инсталација

Автор: Љупчо Димитровски

Препев на пев и повев

Се изделил
еден човек од еден
среде круг зрачен,
среде некој нечуен ѕвон
сè уште жизнен,
па мигум одлетал на врв
на мраморен обелиск
испишан со тајно писмо,
со зборови кои некогаш
значеле нешто,
може именувале дамна
изгубен свет.

Сега кој да застане
пред човекот среде круг
зрачен,
среде некој нечуен ѕвон
сè уште жизнен,
го прашува зошто и како
дозволил од него човек
да се издели човек,
поготово што обелискот
е испишан со тајно писмо
или може именува дамна
изгубен свет човечки.

Наместо него одговара
изделениот од еден човек
двајца:

„Се изделив јас како
еден човек од него
и мигум одлетав на врвов
на мраморниов обелиск,
некако,
зашто во него од раѓање
му бев само негова сенка
без која не може да дише,
ниту, пак, се обидува
да го открие писмово,
тајно и именувачко,
што дамна го испишале
наши предци и потомци“.  

ПРЕПЕВ НА ПЕВ И ПОВЕВ, Зрачат сни, поетска инсталација, 9 

За авторот: Љупчо Димитровски

Долгогодишен радио и ТВ новинар, писател и медиумски уредник со повеќе од 40 години искуство во електронските медиуми. Автор е на над 150 книги и основач на порталот Panoptikum.mk, како продолжение на култната емисија „Паноптикум“, со силен фокус на комуникација и новинарство.

За повеќе написи од авторот кликни тука.

Важна напомена: Сите права се задржани. Не е дозволено какво било преземање, копирање, објавување или преработка на делови или цели содржини од овој портал без претходно одобрение од авторот, редакцијата и/или издавачот. За секоја повреда на авторските и сродните права, Паноптикум го задржува правото да побара надомест и соодветна правна заштита.

Уредничка напомена: Во подготовката на содржината може да се користи дигитална/AI асистенција како помошна алатка за јазична, структурна, истражувачка или визуелна обработка. Финалниот текст е уреднички прегледан и објавен под одговорност на авторот и/или редакцијата. Главната илустрација на написот може да биде фотографија, авторска/архивска слика или AI-генерирана концептуална илустрација создадена за визуелна поддршка на текстот.