26. Болештини
Еден човек во години, кој може да ми е само мене познат, ми вели убедливо дека отсекогаш имало, има и допрва ќе има разни болештини, од најлесни до најтешки. Кои во прво време се неизлечиви или изгледаат такви, па по некое случајно или со многу знаење и опити се наоѓа лек и се излекуваат. За повторливи во некое годишно доба или во невреме се изнаоѓаат и заштитни кои се користат превентивно.
Ме убедува, ама не може да ме убеди. Се обидувам да го разубедам:
-Ти си човек во години! Не можам да разберам како тоа да не си научил или искусил досега дека биле, се и засекогаш ќе бидат неизлечиви.
-На пример?-ме прашува сомничаво.
-На пример оние на душата што идат од љубов непреболна.
Се смее речиси громогласно, одмавнува со рака и ми вели пак убедливо:
-Многу грешиш. И тие се излечиви. Ги излекуваат времето и заборавот. Можам да ти раскажувам за многу мои такви.
Го поздравив, па се оддалечив од него колку што можев побрзо. Поразен.
