Слушаш песна
слушни песна
не слушај песна
наслушни.

Песна пее што не се пее
во некоја состојба човек
кој некогаш бил човек
може некогаш уште да е
за да дознае за да сознае
до каде бил само човек.

Нема зборови
нема запирки и точки
нема воздиви и издиви
меѓу два премолчени
и два заборавени света
сонувани како еден.

Песна пее што не се пее
во некоја состојба жена
која некогаш била жена
како жар во огниште
што тлее
како по смрт на рожба
што во неа живее.

Има мрачнини
преполни со тишини
кои проникнале длабоко
во нејзината и неговата
љубов непрепеана
од јазик на спокој
на јазик на недоод
низ студени ноќи
и врели денови.

Песна пее што не се пее
птица на небо
раскрилена на земја
без гнездо
за свој род и почин
пред преселба во самост
во непознат предел.

ЈАНЅИ ОД ЈАВА ВО ЈАЗОЛ, Грижен, стихозбирка, 24