4. Грижа голема
Ми се насобра,
ми се згрутчи в срце
грижа голема
за моите корени
во оваа суша,
во запустеново беспатје.
Никако да ја пробијат
земјата,
никако да израснат
фиданка
што ќе им го продолжи
животот,
што ќе им дава сила
да продолжат
сè длабоко
да вкоренуваат
извесност.
А сè повеќе, а сè подолго
сами под облачно небо,
под црни облачни змејови
што фрлаат огнови.
Дали и овојпат
како многупати досега
срцево ќе ја надмине?
Или на моите корени
во оваа суша,
во запустеново беспатје
ќе почне да им се суши
срцевината?
