21. Припаѓање
Се расправаат полугласно двајца средовечни мажи на улица. Минувачите или не ги слушаат или се преправаат дека не слушаат. Некои подзастануваат за да потслушнат дека слушнатото им станало интересно.
Првиот:
-Те жалам, човеку. Припаѓаш и дозволуваш да припаѓаш од припаѓање и докажување дека припаѓаш.
Вториот:
-Не те разбирам.
Првиот:
-Знам дека разбираш, но се преправаш дека не разбираш, па ај да ти објаснам. Припаѓаш на партија, веќе припаѓаш од работа и секакви дејанија за неа, всушност за твојот предводник и неговите избрани измеќари, а згора на тоа мислиш дека е малку. Па на секаков начин се обидуваш да им докажеш на твоите сопартијци дека им припаѓаш.
Вториот:
-А, значи мислиш на мојата партиска припадност. И јас би се жалел себеси кога би бил таков…Многу грешиш, пријателе. Да, точно, припаѓам на партија, ама ниту сум припаднал, ниту припаѓам од припаѓање и докажување дека припаѓам. И што оти припаѓам? Тоа е мое демократско право.
Првиот:
-Се разбира дека е твое, како што е мое да не прифаќам…
Вториот:
-Ај не ми се прави недоветен. Ќе ти речам баш во врска со твоето неприфаќање. Ти не прифаќаш поради неприфаќање и и да им докажеш на оние што не прифаќаат дека не прифаќаш.
Првиот:
-Ама ми го рече… Ништо не разбрав!
Вториот:
-Знам дека разбра, но се преправаш дека не разбираш, па ај да ти објаснам. Ти не прифаќаш однапред, што значи уште пред да дознаеш што, колку, како, а само за да бидеш со таквите како тебе.
Првиот:
-Грешиш, човеку! Јас секогаш знам што не прифаќам, и зошто и колку и како, но никогаш однапред. А не сум со такви како мене, ниту познавам некој таков. Ако сум како што мислиш дека сум, тоа значи дека сум неутрален односно непартиски или натпартиски. Што има лошо во тоа?
Вториот:
-А што има лошо во тоа дека припаѓам и докажувам дека припаѓам, но се разбира дека не припаѓам односно не премалувам од припаѓање?
Еден минувач кој подолго од другите беше подалеку подзастанат за да потслушне и се разбира дека доволно слушнал им дофрли за да чујат:
-И обајцата сте за никаде.
И се оддалечи. Двајцата средовечни мажи се погледнаа зачудено и се разотидоа.
