5. Камена песна

Од кој ли простор
надошла песнава
камена
што ја слушам
како да е од многу
одамна?

Камено срце ли ја
создало
или некој со срце
во камен?

Не прашувам
оти ја прекажувам
во мое време
како да е моја,
ами дека воопшто
не е студена,
што значи
сè уште не е сосем
скаменета.

Ја прекажувам,
а ниту збор,
а ниту глас,
а ниту созвучје
нејзино во мене.

Сал мисла
за каменување
на љубов по смрт
што живее.