41. Вечер на Ѕвездана

Ѕвездена ноќ, звездена вечер, вечер на Ѕвездана. Таа и досега има постигнато успеси, и на домашната и на странски музички сцени; докажана талентирана пијанистка, врвен репродуктивец со несомнена блескава иднина. Но, вечерва Ѕвездана доживеа досега недоживеани ѕвездени мигови.

Музичкиот салон во Скопје преполн со почитувачи и љубители на Шопеновата музика. Секое дело изведено во полна тишина и концентрација, бурни аплаузи помеѓу едно и друго предизвикани од совршената слеаност на тоновите, драматиката, ритамот.

Во оваа ѕвездена вечер на Ѕвездана валцерите и ноктурната на Шопен беа живи во неа, живееја од првиот до последниот тон, заживуваа меѓу присутните, сосем го исполнија салонот. Успеа во она што ѝ беше најважно: со своите изведби да ја пренесе едноставноста на радоста, играта, расположбите и емоционалните пресврти во музиката на Шопен.

Сакаше, се трудеше и успеа изведбата на ноктурната да бидат некако понагласени од валцерите, и во техниката и во начинот на свирењето. Особено она што го знаеше како нивна најзначајна карактеристика-развиената мелодија во десната, како и разложените акорди во левата рака. Најмногу време потроши на леснотијата во забележувањето на Шопеновиот ритам, како и синкопирањето како суштински драматуршки елемент. Со особен забележлив занес ги отсвири двете ноктурна кои Шопен ги компонирал во 1835-та и 1836 година-Nocturne in C-sharp minor и Nocturne in D-flat major.

Се разбира, својата пијанистичка виртуозност Ѕвездана ја покажа и со изведбата на Шопеновите валцери што ги избра за оваа вечер, а публиката својата одушевеност од валцерите во cis-moll, h-moll и секако Минутниот валцер-Minute Waltz.

Целата музичка сцена, околу Ѕвездана и пијаното беше покриена со букети цвеќе, а крајот беше неколкупати одлаган со бисови и десетина минути непрестан аплауз проследен со извици „Браво!“.

Ѕвездана, Апостол и Славка не чекаа да се приберат дома по завршувањето на концертот. Кога се подиспразни Музичкиот салон воспоставија аудио и видео контакт (Viber) со Бисера и Пламен.

Ѕвездана:

„Мили наши, не можам да ви пренесам како се чувствуваме јас, Апостол и Славка од почетокот до крајот на мојот вечерашен концерт со Шопенови дела. Го сними Апостол; сите случувања на него, меѓу изведбите и на крајот. Ви го испраќаме целиот видео клип, а вечерва дома ќе го поставиме на YouTube. Знам дека се гордеете со вашата Ѕвездана. Поздрав“.