Па си биле што не си биле животни и луѓе, спротивни и спротивставени едни на други.

Па животните решиле да заживеат покрај луѓето, белки ќе можат едни со други освен едни покрај други. Им отишле на луѓето и им рекле дека ако треба ќе дозволат тие и нив да ги спитомат. Иако мислат оти не треба просто затоа што како диви одамна не живеат во дивина.

Па луѓето ништо не разбирале што им кажуваат, од проста причина што не им ги знаеле јазиците. Им биле многу и ептен различни. Им предложиле да си направат еден јазик кој сите ќе го разбираат, па после и тие-луѓето ќе се потрудат да им го научат. После здравје, ќе видат како и што.

Па животните им рекле на луѓето дека тоа што им го предлагаат е невозможно да се оствари. Исто како што е кај нив со нивните јазици. Прво и прво затоа што секој си го збори својот јазик, он је ем најубав ем најбогат ем најлесен за учење, па ако некој сака да го разбере нека му го научи. Тоа, пак, од друга страна кажува дека животните не само што не требало да решат што решиле, ами и не требало ни да помислат на тоа-да заживеат покрај луѓето едни со други освен едни покрај други. Нека си остане како што се.

Па така, до ден-денес си биле што не си биле животни и луѓе, спротивни и спротивставени едни на други.

БАСНИ БЕЗ НАРАВОУЧЕНИЕ, сатиралии, 35