ЧОВЕК ВО ЖИВОТОТ СЕ НАЈДУВА НА МНОГУ И НА ЕДЕН КРСТОПАТ. НА МНОГУ ПОПАТНИ ИЛИ ДЕКА РЕТКО ОДИ САМ ПО СВОЈ ПАТ, И НА ЕДЕН КАКО КЛУЧЕН, ПРЕСВРТЕН, ПРЕСУДЕН. НА МНОГУ ИЛИ НА ЕДЕН, ТОА ЗАВИСИ ПРЕД СĖ ОД ЖИВОТНОТО ПАТЕШЕСТВИЕ.
СЕ НАЈДЕ ЧОВЕК НА ЕДЕН ПО МНОГУ КРСТОПАТИ. НА МНОГУТЕ СТОЕЛ МАЛКУ ВРЕМЕ ВО ДВОУМЕЊЕ КОЈ ПАТ ДА ФАТИ, А НА ЕДЕН Е ОД КОЈЗНАЕ КОГА. НИКАКО ДА СЕ ОДЛУЧИ КОН КАДЕ, КОНЕЧНО ДА ГО ИЗБЕРЕ СВОЈОТ, ПРАВИОТ, ВИСТИНСКИОТ.
НАЈПРВИН НИКАКО ДА СИ ОДГОВОРИ ДАЛИ ТРИТЕ ПАТИШТА ПОЧНУВААТ ИЛИ ЗАВРШУВААТ НА КРСТОПАТОВ. ОД ИСКУСТВО ЗНАЕ, СОБРАНО И ДОКАЖАНО НА МНОГУТЕ КРСТОПАТИ ШТО ГИ МИНАЛ, ДЕКА ОД ТОЈ ОДГОВОР НАЈМНОГУ ЗАВИСИ ДАЛИ ЌЕ ГО ПРОДОЛЖИ СВОЕТО ЖИВОТНО ПАТЕШЕСТВИЕ ИЛИ, ПАК, ЌЕ МОРА ДА ЗАПОЧНЕ НОВО.
ПОТОА СЛЕДИ ДОГЛЕДУВАЊЕТО НА ДАЛЕЧИНИТЕ. ЕДЕН ОД ТРИТЕ ПАТИШТА ОД КРСТОПАТОТ ГО ДОГЛЕДУВА НАЈДАЛЕЧЕН, НО И ПРИЛИЧНО КРИВУЛЕСТ, ЕДЕН ЗАВРШУВА ВО ТОЧКА НА ХОРИЗОНТОТ, НО ИЗГЛЕДА ПУСТОШЕН, А ЕДЕН, НАЈТЕСЕН ОД ТРИТЕ, МИНУВА НИЗ ПРИСОИ И ОСОИ НА ПЛАНИНИ СО ВРВОВИ ДО НЕБО И ВИСОРАМНИНИ.
НАЈНАКРАЈ СЕ ПРАШУВА ДАЛИ Е ОВА ЗА НЕГО ПОСЛЕДЕН КРСТОПАТ. АКО НЕ Е, ТОГАШ ДАЛИ МОЖЕ ДА БАРЕМ ДА ПРЕТПОСТАВИ НА УШТЕ КОЛКУ ЌЕ СЕ НАЈДУВА? ИМА ЛИ НЕКОЈ ЗНАК, ПРИЗНАК ИЛИ НЕКОЈА РЕТКА ПОЈАВА КАКО ОДГОВОР?
МОРА ДА ГО НАДМИНЕ КРСТОПАТОТ ПРЕД ЗАЈДИСОНЦЕ. ПРЕД ЗАЈДИСОНЦЕ ДА СИ ГО ПРОДОЛЖИ ЖИВОТНОТО ПАТЕШЕСТВИЕ. ЗОШТО? НАПРОСТО ЗАТОА ШТО ВО САМРАК И ВО МРАК МЕСЕЧЕВАТА И ЅВЕЗДЕНИТЕ СВЕТЛИНИ НЕ МУ СЕ ДОВОЛНИ ЗА ДА БИДЕ СИГУРЕН ДЕКА ПАТОТ ШТО ГО ФАТИЛ Е САМО НЕГОВ.
НАСЛОВИ (СЀ ВО НАСЛОВ), насловна проза, 69
