7. Часовник без клатно
Не е на ѕид
за да мери време
туку е заборавен
на него.
Како одамна
да мерел времиња
на мртви предци.
Нема клатно
а има сказалки
запрени на полноќ.
Многу е веројатно
клатното да му е
заробено
во нечие траење
измерено.
8. Порта
Крај улица порта
голема отворена
за секој
да може да влезе
и да узнае чија е
трошната куќата
оставена
та заборавена
од некој од сите
заборавен.
Скоро улицата
ќе се шири
поради што
портата и куќата
ќе мора
да бидат урнати.
9. Прибор за јадење
Златни и сребрени
ножеви лажици виљушки
стојат на располагање
на гладни и понекој сит
седнати на долга маса
да слават нечија слава.
Гладните чекаат јадења
што се јадат со раце
и пријатност.
Ситите со задоволство
пијат кисела вода
чекајќи ги јадењата.
СЕКИДНЕВИЕ, Потребности, припеви
