И од една и од друга
и од многу страни
на луѓе збрани
во пустелијава
црвеникава, жолтосана,
овде-онде црникава,
одеднаш се зададоа
ветришта безимени,
одеднаш се зададоа
облачишта молскотни,
овде-онде се отворија
длабоки бездни
кои во себе проголтале
безмерни, скрвавени
тишини.
Збрани луѓе
од сите страни
во збег.
Одеднаш од страна
северна
се зададе огон
загадочен, необјаснив,
непредвидлив,
со супрашка во утробата
која задушува
сечија прва и последна
воздишка опстаночна.
Последен збег
со нем говор оддалеку:
невидливи живеалишта
во стени.
ВНАТРЕШНИ СОДРЖИНИ, Пустелија, поетска студија, 5
