58. Различни
Сведочам дека тој и таа се како заедно зашто и карактерно и мислечки се сосем различни. И токму со нив да докажам дека различностите секогаш не се привлекуваат, што не значи дека не можат да бидат заедно.
Да, докажувањето ми е дека се заедно. Цели шест децении. Со многу род и ближни. Задоволни и среќни? Не знам. Којзнае.
А како карактерно и мислечки сосем различни, отсекогаш се почитувале и се почитуваат. Не знам дали и колку се сакале, а не знам ни дали и колку се сакаат. Никогаш не сум забележал некоја посебна близост, камо ли нежност.
Признавам дека најмногу ми пречела и ми пречи сериозноста на нивните лица. Која неретко беше и е безизразна. Најчесто како длабоко замислени, па и загрижени.
Едно нешто ми е сосем неразбирливо: никогаш не се согласни, за што било! Барем јас не паметам дека биле пред мене.
Најчесто се молчаливи. Или ако разговараат меѓусебно, разговараат за нешто безначајно, банално. Никогаш не завршувајќи го разговорот со согласност.
Реков дека се како заедно? Да, зашто мислам дека се како да не се. Во сите изминати заеднички цели шест децении.
