23. Аполитични
Со средовечна при разминување:
-Отсекогаш сум била и сум аполитична. Го живеам животот со полни гради и не дозволувам политиката да ми го насочува, да ми го пренасочува, да ми го условува.
Јас:
-Тоа е невозможно овде и во нашево време. Возможно е во развиениот свет. Мора нешто во твојот живот да звисело или да зависи од неа. На пример твојата кариера.
Таа:
-Не мислам да те убедувам, уште помалку да те разубедувам. Композитор сум и ме интересира само музиката. Ништо друго!
Јас:
-В ред. Блазе си ти. Искрено ти завидувам.
Таа:
-А ти? Ти си политичен?
Јас:
-Јас сум политиколог, ама не ме интересираат дневната политика и политикантството. Катадневно се борам против партизацијата.
Се загледавме еден во друг, си упативме весели насмевки, се поздравивме и продолживме секој по својот пат.