19. Жедна песна

Жедна ми е песнава
за од љубов и по љубов
на луѓе кои првпат
се виѓаваат како луѓе
пред мрежа пајакова
низ која заедно мораат
да минат;
за сите во миг
да се најдат
среде круг светлина.

Исто како нȇма игра
за од говор и по говор
на птици кои првпат
се на небо како птици
пред молњи облачни
низ кои заедно мораат
да минат;
за сите во еден глас
да се најдат
среде круг светлина.

Жедна ми е песнава
за човек исправен,
истраен и стамен.