Излези од водава бистра и ладна
Одамна минаа крај неа и крај тебе
Следачите на твојата трага
Уште од пустошот што го остави
Зад себе како последен обид
Да бидеш еден и препознатлив.
Излези спокојно безгрижно
Па тргни кон изворот далеку
Што е најдалеку од тебе
Од сите уште животворни.
Можеби ќе стасаш
Пред да премалиш
Можеби.
Не грижи се за оние кои
Минаа одамна крај тебе
Следејќи ти ја трагата
Они се веќе далеку
Во осои на голи мртви планини
Па им е залудно да се обидат
Однов да тргаат по тебе.
И не грижи се дали ќе стигнеш
На изворот најдалеку
Од сите уште животворни.
Секогаш можеш пак
Во водава бистра и ладна
Еден и препознатлив.
ЈАНЅИ ОД ЈАВА ВО ЈАЗОЛ, Новота, стихозбирка, 52