22. Глас во знак

Начув мој глас во знак
крајпатен,
сокриен, неоткриен,
сал за мене догледен,
сосе некое дамнешно
за сегашно време.

Мој глас оставен
по преумора,
по долг самотен бег
од ветришта, огнови
и пустошења.

Ме прави спокоен,
па и надежен
дека мој глас во знак
крајпатен
ќе биде жив за секој
што ќе реши
да го следи мојот пат,
а како предупреда
дека:

ветриштата, огновите
и пустошењата
во долг самотен бег
се пресилни, се лути,
се бесцелни
ако до последни сили
не им се опираш,
не ги обеснажуваш
со умност.