Почнал со едно слово
па продолжил до друго
надевајќи се дека потоа
со нив ќе достаса трето
за најпосле да заврши
во многу за разбирање
со еднакви
блиски и далечни
близу и далеку.

Кој да го праша
му одговара дека
му било најтешко
да почне со едно слово
бидејќи не му биле
на располагање повеќе
згора на тоа тој бил
без никакво значење
и без никаков свој знак.

Кога никој не го прашува
тој си одговара дека
колку повеќе слова
по првото за почнување
му биле слични
особено по звучност
толку разбирањето
било полесно и поточно
без продолжување
со некакви знаци
или некакви симболи.

На почетокот може
знаел како се почнува
со едно слово
за да се продолжи
до друго
дури не се достаса трето
но во меѓувреме научи
колку сите по првото
се а не би требало
да личат еден на друг
формално и структурално
особено семантички.

Сега стравува
да не го онемат словата
неброени
што ги присобрал
низ своите животи
со блиски и далечни
близу и далеку.

ПРЕПЕВ НА ПЕВ И ПОВЕВ, Сетне, поетска инсталација, 72