СЕ УРНА КУЌАТА САМА ОД СЕБЕ. ТАКА СЕ УБЕДУВА СЕБЕСИ И УБЕДУВА ДРУГИ СИЛЈАН БИЛКАРОСКИ, НА СВОИ ШЕЕСЕТ И ДВЕ-ТРИ ГОДИНИ. СЕ УРНА САМА ОД СЕБЕ ВО ЕДЕН МИГ. Ѝ ГО СВРТЕ ГРБОТ СИЛЈАН, НЕЈЗИНИОТ ПОСЛЕДЕН ЖИВ МЕЃУ НЕКОЛКУ ПОКОЛЕНИЈА МРТВИ ДУШИ ВО НЕЈЗИНИТЕ ТЕМЕЛИ, ЅИДОВИ, ВРАТИ, ПРОЗОРЦИ, КАМЕНИ И ДРВЕНИ СКАЛИЛА, ЧАРДАК И ПОКРИВ ОД ЌЕРАМИДИ. ДА, И ВО ДВОРОТ И НАДВОР, ПРЕД ПОРТИ.

СИЛЈАН БИЛКАРОСКИ НЕ ГО ВИДЕ УРИВАЊЕТО НА КУЌАТА САМА ОД СЕБЕ. ВЕЌЕ МИНА СТОТИНА МЕТРИ НА ПАТОТ КОН ГРАДОТ КОГА СЛУШНА КАКО СЕ УРИВА. СО ГОЛЕМ ТРЕСОК. ЗНАЧИ, НЕ СЕ СВРТЕ ДА ВИДИ, А СЛУШНА. ОДЕКА ВО НЕГО.

ЗНАЕШЕ ДЕКА ЌЕ СЕ УРНЕ? СЕ РАЗБИРА. НЕ ЗАТОА ШТО Ѝ МИНА ВЕКОТ, Ѝ ПОПУШТИЈА СТОЛБОВИТЕ И ЅИДОВИТЕ, Ѝ ПОПУШТИ ТЕМЕЛОТ. НЕ!

КАКО ЗАКЛУЧИ ДЕКА СЕ УРНА САМА ОД СЕБЕ?!

ОДАМНА ЗНАЕШЕ ДЕКА И НЕЈЗИНАТА СУДБИНА ЌЕ БИДЕ ИСТА КАКО НА СИТЕ ДРУГИ БЛИСКИ И ДАЛЕЧНИ КУЌИ. КОЈА ПОРАНО, КОЈА ПОДОЦНА. ОД ШТО? ПОРАНО ИЛИ ПОДОЦНА ОД ЖИВОТОТ ВО НЕА.

СЕ УРНА КУЌАТА САМА ОД СЕБЕ ВО МИГОТ КОГА СИЛЈАН БИЛКАРОСКИ Ѝ ГО СВРТЕ ГРБОТ. ПРЕД ТОА Ѝ ГО ИЗГАСНА ОГНОТ ВО ОГНИШТЕТО СРЕДЕ ДНЕВНАТА СОБА, МОЛЧЕШКУМ ИЗЛЕЗЕ ОД НЕА И ГО ФАТИ ПАТОТ КОН ГРАДОТ. НЕ НИ ПОЗДРАВУВАЈЌИ СЕ СО НЕКОЛКУТЕ ПОКОЛЕНИЈА МРТВИ ДУШИ ВО НЕЈЗИНИТЕ ТЕМЕЛИ, ЅИДОВИ, ВРАТИ, ПРОЗОРЦИ, КАМЕНИ И ДРВЕНИ СКАЛИЛА, ЧАРДАК И ПОКРИВ ОД ЌЕРАМИДИ. ДА, И ВО ДВОРОТ И НАДВОД, ПРЕД ПОРТИ.  

НАСЛОВИ (СĖ ВО НАСЛОВ), насловна проза, 58