Како да си купите остров? Прашање што звучи како шега, а денес е сосема реална дилема за оние што одамна го надминале поимот „доволно богат“. Ако си ослободен од секојдневните грижи, ако парите одамна престанале да бидат мерка, тогаш логично е да посакаш нешто што е подалеку од очите на цивилизацијата. Нешто што не може да се изнајми, копира или имитира. Остров, на пример.
Купувањето остров одамна не е егзотична фантазија од филмови или романтични приказни за пирати. Денес тоа е последниот, највисок степен на статус во светот на луксузните недвижнини. Не куќа, не замок, не облакодер – туку парче земја опкружено со вода, тишина и чувство дека светот завршува таму каде што ти сакаш.
Островот како бегство од светот
Она што најмногу ги привлекува богатите не е само идејата за сопственост, туку изолираноста. Островот не е само имот, туку дистанца. Од луѓето, од вревата, од правилата. Тој е симбол на целосна контрола врз просторот, времето и ритамот на животот. Трендот е јасен – колку подалеку од цивилизацијата, толку подобро.
Малкумина знаат, а уште помалку зборуваат за тоа, дека приватното поседување острови постои ширум светот и дека има десетици, ако не и стотици напуштени острови со сериозен потенцијал. Некои се идеални за туристички развој, други за приватни резиденции, а трети – едноставно за исчезнување од јавноста.
Кога славните купуваат тишина
Листата на познати личности што поседуваат острови е подолга отколку што изгледа на прв поглед. Николас Кејџ го купи островот Leaf Cay на Бахамите за околу три милиони долари – бујна вегетација, песочни плажи и вода што изгледа како фотошопирана. Еди Марфи е сопственик на Rooster Cay, платен околу 15 милиони долари, додека Мел Гибсон го поседува островот Mago на Фиџи – еден од најголемите приватни острови во светот.
На истата листа се и Џони Деп, Леонардо Ди Каприо, Селин Дион, Дејвид Коперфилд, Михаел Шумахер, Рики Мартин, Стивен Спилберг, Дијана Рос и Шакира. За нив островот не е инвестиција во класична смисла – туку осигурување од светот.
Најскапото парче осаменост
Пред неколку години на пазарот се појави остров што веднаш ја доби титулата „најскап на светот“. Станува збор за Ронд остров, лоциран во Карибите, со површина од над 100 хектари. Проценката одеше и до фантастични 100 милијарди долари, иако конечната продажна цена никогаш не беше јавно објавена.
Агенцијата што го претстави островот на светскиот пазар не зборуваше за луксуз – туку за изолираност, недопреност и потенцијал. Корални кањони, подводни пештери, идеални услови за нуркање и сценарио во кое по изградба на приватни вили може да се заработат и над милијарда долари. Островот како бизнис, но и како мит.
Грција – распродажба на рајот
Од 2013 година наваму, Грција стана едно од најактивните жаришта за продажба на приватни острови (најпознатата и најкредибилна платформа специјализирана исклучиво за купување и продажба на приватни острови ширум светот.) . Се проценува дека околу стотина острови се продадени или сè уште се нудат на пазарот. Меѓу најскапите е Омфора – 1.112 хектари во Јонското Море, со цена од околу 50 милиони евра. Причината за продажба е едноставна и сурова – финансиската криза ги натера дури и најбогатите да се откажат од „семејните митови“.
Иако цените драматично паднаа, реалната пречка за купување не е парите, туку бирократијата. Дозволи, студии, еколошки анализи – процеси што траат со години и знаат да ја убијат романтиката уште пред првиот чекор.
Пари има, дозволи нема
Дури и Хамад бин Калиф Ал-Тани не успеа да го скрати времето. Тој купи шест острови во близина на Итака за помалку од девет милиони евра, со идеја да има по еден остров за секое од своите 24 деца. Но и покрај моќта и влијанието, мораше да чека повеќе од една година за градежни дозволи. Пари можеш да имаш веднаш – системот не се купува толку лесно.
Наследство, а не тренд
Внуката на Аристотел Оназис го продаде легендарниот остров Скорпиос во Јонското Море за сума што се проценува на околу 76 милиони евра. Купувач беше рускиот бизнисмен Дмитриј Риболовлев, наводно како подарок за својата ќерка. Симболиката е јасна – островите не се купуваат за денес, туку за генерации.
Стручњаците за луксузни недвижнини постојано нагласуваат дека ваквите можности се појавуваат еднаш во неколку децении. Островите најчесто се пренесуваат од колено на колено, како семејни митови, не како обичен имот. А Грција, со повеќе од 15.000 километри брег, околу 6.000 острови и островчиња и речиси 190.000 плажи, е неисцрпен резервоар за соништа со цена.
Престижот како крајна дестинација
Брокерот за луксузни недвижнини Кристофер Босвел од агенцијата Vincitore, кој продал имоти вредни над 300 милиони долари ширум светот, тврди дека пазарот полека се консолидира. Дубаи, Абу Даби, Саудиска Арабија, Кина – сите покажуваат знаци на нов подем. Грција, според него, е следна на ред.
Да се има остров денес значи дека си стигнал до врвот. Не затоа што имаш уште еден имот, туку затоа што имаш луксуз што не се мери во квадратни метри – туку во тишина, простор и чувство дека светот може да почека.
