Мраморен столб
стожерен
а околу него стари дрвја
без корен без срцевина
наредиле на чистина
во дамнешни времиња
луѓе кои деноноќно
ги гледале далечините
сјајот на ѕвездите
нивните тишини
притоа смислувајќи
заедничко постоење
со сè уште живи предци
и отуѓени потомци.

Чудна некоја градба
на чистина обградена
со стеновити планини
без никакви траги
на искачување
за живот на дофат
на сонце или месечина.

Оддалеку не може
да се разбере смислата
на градбата
но одблизу лесно
се открива содржината
сосе функцијата
на мраморниот столб
стожерен
особено на дрвјата
стари околу него
без корен и срцевина:

чистината обградена
со стеновити планини
очигледно служела
за секакви игри со кои
се довикувале
богови и божици
да им бидат наклонети
на луѓе доблесни
да им помогнат
да опстанат борејќи се
против непријатели
на нивното постоење;

тие сигурно биле
еднакво можеби
повеќе во сегашни
одошто во дамнешни
одошто во идни времиња
затоа што
заедничкото постоење
со сè уште живи предци
и отуѓени потомци
отсекогаш било
и секогаш ќе биде
крајно неблагодатно.

ЈАНЅИ ОД ЈАВА ВО ЈАЗОЛ, Новота, стихозбирка, 70