Никој не го знае правото лице на глумецот кого секоја вечер, освен работните и неделните може да се гледа на сцената на Народниот театар. Никој не го знае зашто никому не му го покажал. Го крие деноноќно, меѓу две претстави? Зошто би го криел?!

Некои тврдат дека тој сам се смета себеси глумец од раѓање, а тоа меѓу другото значи оти нема право лице. Со други зборови, сите негови лица во претставите што ги игра му се прави. Тие што го тврдат тоа токму затоа го сметаат за голем глумец.

Секој подобар познавач на глумата мисли дека го заборавил, можеби го изгубил своето право лице играјќи на сцената на Народниот театар секоја вечер, освен саботните и неделните.

А никој, па ни самиот глумец не знае дека лицето на дворскиот шут, кого веќе неколку години го игра во претставата “Изроднички шути и рогати”, е неговото право лице.

ТИВКИ КЛОКОТИ, рефлексивни искази, 128