Козар им се обраќа на блиски и далечни:

-Не ме задевајте, луѓе. Во последно време не ми се сите кози на број.

Еден од луѓето со чудење:

-Како бре, козару пријателе, не ти се сите?! Колку ти фалат?

Козарот:

-Не знам колку. Неколкупати ги броев и секогаш ми остануваа неизброени различни. Како да се подигруваат со мене…Оставете ме на мира дури не ги најдам и пак да ми се сите на број.

Еден од луѓето се досетува:

-А да не станува збор за твоите кози, туку за твоето расположение?

Козарот го загледува и му одговара отсечно и подналутено:

-Колку што јас знам, таа народна изрека не се однесува на козари. Кога на човек што не е козар не му се сите кози на број, тоа значи дека не е како што е нормално, обично, па треба да се остави на мира оти може да направи нешто неконтролирано или непромислено. Па после луѓето со него и околу него да не знаат како да се спасат од последиците. А јас сум козар и кога велам дека не ми се сите кози на број, тоа значи дека не ми се и само затоа сум загрижен, дури уплашен. Морам под итно да ги пронајдам. Најмногу ме секира тоа што не знам зошто при секое броење ми фалат различни кози. На пример, на претпоследното ми фалеа Милка, Трпана и Стојна, а на последното не ми фалеа тие, туку Јаглика и Благојка.

Еден друг од луѓето се досетува:

-Според твоево кажување дека не ти се сите кози на број, постојано ти фалат само кози. А што е со прчовите? Немаш или тие не се твоја грижа, туку на твокјата козарка?

Козарот замислено:

-Видиш, на тоа воопшто не сум ни помислил…Откога со  мојата козарка ја поделивме козарската работа, јас да се грижам само за козите, а таа само за прчовите, за да ни биде полесна работата, мене не ми се сите кози на број, а прчовите кај неа се секогаш…Многу, многу сомнително.

Еден трет од луѓето расположено:

-Знаеш што мислам јас, козару пријателе? Дека ти при броењето погрешно си го насочувал вниманието на козите. Не ти се тебе сите кози на број, па треба да внимаваме како да се однесуваме спрема тебе, да не ја истуриш лутината врз нас поради тоа. Всушност, ти треба да си одговориш на прашањето зошто ти се секогаш сите прчови на број. Не ќе е лошо да провериш што ти прави друшката ти козарка со прчовите…Додека ти ги чуваш и ги броиш козите.

Козарот по малку зачудено и наивно:

-А што би можела да прави со нив?…Ќе проверам во што е проблемот…Во секој случај, засега оставете ме на мира. Не ме задевајте зашто, да ви повторам, во последно време не ми се сите кози на број.     

Откако го оставиле на мира, на козарот му паднало на памет дека во последно време неговата козарка ги остава прчовите во трлото со овци, а таа се дотерува и ја снемува некое време. Па е нормално тие секогаш да се на број…Чудна работа.

БАСНИ БЕЗ НАРАВОУЧЕНИЕ, сатиралии, 40