34. Сокривалиште
Како секој
пред секое невреме
и јас совреме си направив
сокривалиште
за мене со моите ближни.
Сокривалиште
длабоко подземи
што да не може никој
ни намерно ни случајно
да го пронајде.
Засега нигде не оставив
никаква трага
ниту некаков знак
до него.
35. Врвица
Има една врвица
што води до мој врв
на висока планина.
Ми требаше
многу време
потрошив
многу години
за да ја покријам
со живо трње
со живи корења
и со живи сенки.
Спокоен сум
оти не може никој
да врви по неа
пред мене
или по мене.
36. Огниште
Моите предци
заедно
со моите потомци
направиле огниште
за оган
среде нивни животи
и нивни судбини.
Можам да потврдам
дека огништето
е старо
колку што е стара
пепелта во него.
Колку што е немоста
околу него
која не дозволува
да разгорам нов оган.
СЕКИДНЕВИЕ, Појавности, песни/припеви, 34-36
