38. Петел на буниште

Еден петел бил избран од кокошките несилки секое рано насабајле да се качува на буниште и да кукурига сè додека не се разбудат сите, па со заеднички сили и умност да почнат да работаат и да дејстуваат во интерес на развојот на живинарската фарма, со посебен акцент на кокошарникот. Петелот не бил избран само поради тоа што кукуригал силно и продорно, туку и оти бил млад, силен, полн со елан и полетен. Згора на сè, бил најубав меѓу петлите.

Кокошките просто го обожавале. Многу од нив толку биле вљубени во него, што едвај дочекувале да дојдат кај него на ред, откако ќе престане да кукурига и ќе слезе од буништето. На ред за што? Па се знае за што: за љубовен занес, секс и несење јајца потоа.

Од пред некое време во живинарската фарма, со посебен акцент на кокошарникот, владее мошне тажна атмосфера. Исто како да умрел некој од петлите или кокошките, односно отишол под нож, па во зовриена вода. Што се случило?

Се случило нешто што тешко може да се замисли оти може да се случи во една живинарска фарма, со посебен акцент на кокошарник:

Станал рано насабајле петелот за будење на сите и напросто се стаписал кога видел дека буништето го нема! Како го нема?! Така, го нема. Прекуноќ! Како може да исчезне едно буниште? Па тоа е невозможно! Мора некој да стапил во ноќна акција, да го собрал буништето и да го пренел негде, може на некое тајно место. Но, зошто?!

Затоа што во меѓувреме буништето незабележано станало ептен големо и високо, речиси до небо. Ај тоа, но дотолку повеќе почнало да се шири лево и десно, напред и назад, што почнало да зафаќа и туѓи живинарски фарми, со акцент на кокошарници. Веќе ја изгубило својата главна намена-на него да се качува петел и да кукурига од рано насабајле. Почнало непријателство меѓу нив кое морало под итно да се сопре. Затоа некој стапил во ноќна акција.

Сите се сомневаат дека во исчезнувањето на буништето прсти замешала политиката.    

БАСНИ БЕЗ НАРАВОУЧЕНИЕ, сатиралии, 38