19. Црна овца

Здогледал овчарот црна овца среде своето стадо бели, па ѝ се обратил:

-Мори црна овцо, кај се најде сега ти во моево бело стадо? Што бараш во него?

Црната овца одговорила рамнодушно:

-Знаеш што, овчару многупочитуван? Како тоа да нема ниедна црна овца во твоево бело стадо? Зарем досега не научи дека тоа е не само недозволиво, туку и неодржливо? Дека твоево стадо бели овци нема никаква перспектива без макар една црна? Треба да ми бидеш благодарен што јас решив да се замешам во него и да ти помогнам во одржливоста на локално, регионално и меѓународно ниво.

Овчарот ја ислушал без збор од збор до збор, па ѝ рекол со остар тон:

-Слушај јас што ќе ти речам, црна овцо низаедна! Ако ми требаше макар една црна во моево стадо бели овци, немаше да чекам ти доброволно да се замешаш во него. И што ќе правиш сега таква каква што си, згора само една? Една ко ниедна!

Црната овца се задумала некое време, па весело му заблеала:

-Јас знам дека ти не ме сакаш затоа што се плашиш. Сакаш мирно да спиеш. Знаеш дека во природата на црната овца е да не блее како да не ѝ фали ништо, како да ѝ е сè тамам. Згора на тоа, со своето блеење влијае на белите, просто ги буди, па со време неминовно ќе почнат да скокаат, да се бунат, да протестираат. Може и да се кренат на нозе, да кренат револуција. Ќе бидат сè повеќе на број бели овци кои ќе се однесуваат како црни. Исто како јас. Па ќе стануваме сè повеќе како црни и ти да се најдеш во небрано. Или ќе станеш овчар кој ќе нè води и чува според наши потреби и цели, или ќе си побараме нов, со овчарски карактер како нашиот-црноовчарски.  

Овчарот се подумал некое време, па ѝ предложил:

-Знаеш што ми текна, црна овцо? Да ти предложам еден предлог корисен и за мене и за тебе и за стадово бели овци: кога веќе се замеша во моево стадо, ти да останеш во него, да блееш како секоја друга црна овца, значи како дежурна, како глас на овчата совест, а јас нема да те слушам и ќе се правам наудрен дека постоиш. Ако нè фати сите некој зорт, на пример стопаните и властодршците да забранат црни овци, ти да се сокриеш меѓу нозете на белите. Ако тоа не бидува, тогаш со моја помош да се бојосаш бело дури не пројде зортот. И уште ова: да не ги тераш и учиш белите овци да блеат како ти. Сакам да речам, со твоето блеење никако да не влијаеш на нив.

Црната овца не прифатила, па овчарот бил принуден неа прва да ја острижи и заколе.