58. Читач во парк
Неколку момчиња и девојки испоседнати на клупа во паркот се задеваат меѓусебно покажувајќи со прст кон седнат на соседна:
-Човеков чита книга!
Му се потсмеваат? Не. Се смеат подзачудено.
Човекот престанува да чита, ја склопува дебелата книга во рацете, ги загледува неколку мига, па им се обраќа:
-Зошто ви е чудно што читам книга? Вие сега во рацете држите мобилни телефони, комуницирате со другари, пријатели, познајници, гледате видео клипови или играте некоја игричка, но никогаш и никаде не земате книга в раце?
Еден од групата:
-Само за учење. Ни за тоа. Во денешно време на Интернет, портали, електронски книги, Интернет библиотеки, енциклопедии глупаво е да држиш книга в раце, а камо ли да читаш кај и да си.
Му одговара:
-Имаш право, момче. Стварно е глупаво. Мене ми е навика и задоволство.
Ја отвора книгата и продолжува да чита.
Момчињата и девојките продолжуваат да се задеваат меѓусебно.
