21. Лична песна

Секој има лична песна
помеѓу занес од убавина
и стварност испокршена,
раздробена, расфрлена
во пустошна земја;
или помеѓу заумен свет
на опстој со трага
и смрти
во пајакова мрежа.

Мојата лична песна,
која не ја знае никој
кому сум му ја испеал,
сум му ја прекажал,
сум му ја прикажал
од утрина до часови
пополноќни,
ќе ја препеат тишината,
дрвјата, цвеќињата,
изворите и залезите;

за да го продолжувам
животот
на нејзините зборови
громовити,
на нивните семиња
плодни,
на жуборот нивен
игрив,
на нивните страсти,
умори, спокојства,
спомени и сништа.