Настан I
Според кажувања на ближни, пожолтени фотографии, писмени траги и важни датуми, Корен Стаменоски со прекар Име е убеден дека татко му Стојмир и мајка му Милица го зачнале во една од многубројните страсни ноќи, со секс до истоштување, во првата недела од стапувањето во брак. Знае и дека бил посакувано дете, како прво машко во идното многудетно семејство.
На Корен Стаменоски со прекар Име му се еднакво важни и вредни личното минато и сегашноста, поважни од колективните. Во врска со неговото раѓање откри дека заживеал во куќарка опкружена со неплодна земја и река што течела крај неа, а извирала во далечна планина на исток.
