Независниот театар „Златен Елец“ од Скопје во јули ќе има две премиери – дуодрамата „Свињи“ од Томислав Зајец, во режија и адаптација на Тамара Стојаноска, и „Теорема“ од Пјер Паоло Пазолини, во режија и адаптација на Мирко Радоњиќ.
„Свињи“ се подготвува во Битола
Подготовките за претставата „Свињи“ неодамна започнаа во Битола. Станува збор за копродукција меѓу Театар „Златен Елец“ и Центарот за култура во Битола, со план претставата, по премиерата, да патува низ Македонија како дел од редовната практика на овој независен театар.
Во претставата играат актерките Илина Чоревска и Викторија Степановска Јанкуловска. Музиката е на Лука Тоше, а извршен продуцент е Бобан Алексоски.
„Свињи“ е една од најизведуваните драми на хрватскиот автор Томислав Зајец. Делото преку апсурд, црн хумор и гротеска отвора прашања за моќта, одговорноста, самотијата, насилството и бегството од реалноста.
Според режисерката Тамара Стојаноска, претставата не раскажува само навидум комична приказна за две сестри, туку отвора и прашање за тоа како се создава насилството во општество што со генерации функционира без суштински промени и без емпатија.
Премиерата на „Свињи“ е најавена за почетокот на јули во Битола, по што се планирани изведби низ државата и учества на фестивали. Проектот е поддржан во рамките на годишната програма на Министерството за култура и туризам.
„Теорема“ премиерно во Скопје
Наредната недела во Скопје Театар „Златен Елец“ продолжува со пробите за претставата „Теорема“ од Пјер Паоло Пазолини, во режија и адаптација на Мирко Радоњиќ.
Во актерската екипа се Златко Митрески, Бобан Алексоски, Бранко Михајлоски, Ана Јовановска, Леонида Гулевска и Стефан Вујисиќ. Драматург на претставата е Ева Камчевска, а костимите се на Лина Лековиќ.
Премиерата на „Теорема“ ќе се одржи на 2 јули во Младинскиот културен центар во Скопје, а на 3 јули претставата ќе има премиера на отворено во Сули ан, во рамките на фестивалот „Скопско лето“.
Претставата е финансирана од Хартефакт, во рамките на проектот „Култура за развој“, поддржан од Швајцарската агенција за развој и соработка и Министерството за култура и туризам.
Координаторот на проектот Бобан Алексоски посочува дека Пјер Паоло Пазолини и неговата „Теорема“ за првпат се поставуваат во македонскиот театар. Делото, создадено како филм и роман во 1968 година, се темели на приказна за мистериозен посетител што влегува во животот на едно буржоаско семејство и по заминувањето ги остава неговите членови соочени со сопствената празнина, криза или можност за промена.
Фестивалски настапи и гостувања
Покрај двете премиери, Театар „Златен Елец“ најавува и учества на повеќе фестивали. Со претставата „Сина сенка“ од Брајан Рејнолдс, во режија на Тамара Стојаноска, театарот ќе настапи на МТФ „Војдан Чернодрински“, „Скопско лето“ и Нишвил – Меѓународниот театарски фестивал во Ниш, Србија.
Од театарот најавуваат и дополнителни гостувања и фестивалски учества со новите, но и со претходно изведуваните претстави од нивниот репертоар.
