107. Од живот до пред смрт
И живот и смрт
наспоредни во траење
во воздив, во издив
на стена среде пустелија,
исто како среде игра
на ветришта во празнина.
Од живот почнува
сечие извишување
незапирно
помеѓу матни води
и мрачни бездни,
помеѓу искри небесни
и искри во зеници.
До пред смрт
ќе го бранам моето
единствено божество
на знакот, гласот,
словото и молкот,
заедно со сите други
божества на светот
собрани на самоти врв
на мојот идентитет.
Од живот до пред смрт
и живот и смрт
ме премалуваат,
ме безнадежат дека
ни најнакрај нема
да ја досоздадам
совршеноста.
