По надземен иде
подземен живот
значи крај пред почеток
значи почеток пред крај
сосе опстанок на семе
во невреме по време
кога нема на доглед
никаква ведрост гласна
ниту некакво тагување
дека во меѓувреме
изумреле или исчезнале
сите потомци кои
би можеле да продолжат
во огон и огон пред огон
во пустошија
без никаква трага
за паметење
надземен живот кој
неминовно продолжува
како подземен
како надежна самосвест
прилагодена на клима
на која ѝ е сè потешко
да остане каква што е
барем час некој нов миг
а тоа значи секогаш
да се биде подготвен
секогаш да се почнува
без да се продолжува
а тоа значи некогаш
да се продолжи живот
и надземен и подземен
наспоредно.

ОГОН ВО ПУСТОШИЈА, Мразнина, поетска студија, 63